Норвежанецот Линдвик победи и во Инсбрук, Кобајаши комплетно разочара

marius-lindvik

Мариус Линдвик денеска покажа дека големата победа во Гармиш Партенкирхен не била никакво изненадување, откако беше најдобар и на денешното натпреварување во Инсбрук.

Традиционалната турнеја „Четири скокалници“ се пресели во Австрија по стартните победи на Кобајаши и Линдвик, но сега Норвежанецот покажа дека е во подобра форма, славејќи и на скокалницата во Инсбрук. Линдвик на натпреварувањето во Гармиш ја оствари првата победа во својата кариера, но 21-годишниот ски-скокач сега потврди дека станува збор за огромен потенцијал на кого треба да се обрне големо внимание во иднина.

Линдвик беше подобар од конкуренцијата и во првата серија имаше импресивен скок од 133 метри, а потоа во втората му беа доволни 120 за да се искачи на врвот на пиедесталот, по вторпат во рок од само неколку дена. Втор денеска беше Кубацки, додека трет заврши Андре Танде. Интересно, токму Кубацки е на челното место во генералниот пласман откако Кобајаши денеска комплетно разочара со 14-то место, втор е Линдвик со девет бода помалку, но целата разрешница ќе ја дознаеме по последната етапа од скокалниците која ќе се одржи во Бишефсхофен.

Facebook Коментари