Норвешка демонстрираше сила против Полска, Данска на чекор до полуфинале

Селекцијата на Норвешка демонстрираше сила на денешниот натпревар против Полска кој го доби со убедливи 42:31.

Норвежаните прикажаа атомски ракомет во кој Полска беше рамноправна само на стартот на натпреварот, а потоа потона во „канџите“ на својот противник.

Норвешка беше предводена од Бартхолд кој мечот го заврши со десет погодоци, додека еден помалку постигна Сандер Сагосен.

Супер натпревар за Полска одигра ракометарот на Келце, Аркадуш Морито кој постигна десет погодоци без ниту едно промашување.

Репрезентацијата на Данска со 28:24 ја совлада селекцијата на Исланд во одличен ракомет кој го понудија двете селекции.

Данците беа предводени од Матијас Гидсел кој постигна девет погодоци и се истакна пред своите соиграчи, додека кај Исланд одличен беше Омар Магнусон со осум постигнати голови.

Ова е четврти бод за Данска во новоформираната група и оваа селекција заедно со Франција сериозно се наметнува за пласман во полуфиналето, нешто што беше очекувано и пред самиот старт на турнирот.