Норис побрз од Ферстапен, ќе стартува од пол-позицијата на трката во Холандија

Ландо Норис ја освои пол-позицијата за утрешната Формула 1 трка во Холандија и ќе стартува пред актуелниот светски шампион Макс Ферстапен.

Претставникот на Мекларен импресионираше во денешните квалификации и во последниот круг потврди дека е најбрз со предност од 3,5 десетинки во однос на Ферстапен, додека неговиот тимски колега Оскар Пјастри ќе стартува од третата позиција.

Џорџ Расел ќе го комплетира вториот стартен ред, додека до десеттото место се најдоа Перез, Леклер, Алонсо, Албон, Строл и Гасли.

Најголемо разочарување беа Луис Хамилтон и Карлос Саинц кои не обезбедија место во третата квалификациска рунда и на утрешната трка ќе започнат од 12, односно 11. место.

Во пресрет на утрешната трка, Ферстапен е прв со 277 поени, додека Норис може да ја намали разликата откако досега освои 199 поени.