Норис плати скапа цена за своето невнимание, Ферстапен прв на целта во Катар

Макс Ферстапен брзо си го врати првото место од квалификациите во дуелот со Џорџ Расел, а до крајот на трката без поголеми проблеми го потврди и новиот триумф во сезоната, во која веќе ја потврди својата четврта титула во Формула 1 шампионатот.

Трката за ГН на Катар беше одбележана со неколку активирања на безбедносното возило, како и пропустот на Ландо Норис, кој поради непочитување на жолтите знамиња доби стоп-го казна од десет секунди и со тоа ја загуби втората позиција на патеката.

Шарл Леклер на крајот го освои второто место и го остави Ферари во игра за титулата во конкуренција на конструктори, во пресрет на последната трка во Абу Даби. Мекларен има 21 поен повеќе од Ферари, а на последната трка ќе бидат достапни најмногу 44 поени.

Место на победничкиот пиедестал обезбеди и Оскар Пјастри од Мекларен, додека Норис на крајот заврши на десеттото место.

Расел тргна од пол-позицијата, но мора да се задоволи со четвртото место, а до деветтата позиција во Катар се пласираа Гасли, Саинц, Алонсо, Жу и Магнусен.