Норис ја освои пол-позицијата, Мекларен пред титулата во Ф1

Трката во Абу Даби носи 44 поени во битката за конструкторската титула во Формула 1, но ако се суди според квалификациите, Мекларен е пред понесување на ова важно признание во „најбрзиот циркус“.

Ландо Норис се избори за осма пол-позиција оваа натпреварувачка сезона, а саботата да биде перфектна за Мекларен се погрижи и Оскај Пјастри кој имаше второ најдобро време.

Карлос Саинц беше блиску до двоецот на Мекларен и извозе трет најбрз круг, но од друга страна, катастрофалниот викенд за Леклер продолжи и денеска.

Возачот од Монако не се пласираше во завршната сесија и беше само 14-ти, но поради промена на погонската единица утре ќе стартува последен.

Поради денешниот распоред на силите и позитивата од 21 бод, Мекларен како тим е пред титулата во конструкторскиот дел, бидејќи утре ќе треба да се случи чудо во корист на Ферари за да дојде до пресврт на главната трка.