Њукасл се откажа од жалба за црвениот картон на Гордон

Ентони Гордон ќе мора да ја одработи суспензијата на три натпревари поради црвениот картон заработен на дуелот со Брајтон во ФА купот и тоа значи дека нема да игра во финалето на Карабао купот.

Добрата вест за противникот Ливерпул денеска ја потврди менаџерот Еди Хау, кој потенцирал дека Њукасл не пронашол доволно основа за да испрати официјална жалба за промена на одлуката на судијата.

Гордон со агресивен потег оттурна и закачи по главата противнички фудбалер, по што заработи исклучување, а сега ќе пропушти неколку важни натпревари за својата екипа.

Најважниот секако е битката за трофејот во Лига купот, односно финалето на „Вембли“ против Ливерпул на 16. март.

– Дискутиравме во клубот на оваа тема, ја разгледавме ситуацијата и со нашите адвокати, но не најдовме доволно основа за да испратиме жалба. Ентони не сакаше да повреди никого, но не сме оптимисти дека одлуката може да биде променета, – рекол Хау.

Гордон првпат ќе може да настапи на дуелот со Лестер закажан по точно еден месец.