Ниту „Д“ од дерби: Интер го понижи Лацио на „Олимпико“ (ВИДЕО)

Интер го разби Лацио со неверојатни 6-0 во дерби натпреварот во Серија А, меч со кој се затвори 16. коло во најквалитетниот италијански шампионат.

Иако ова требаше да биде соочување на два тима кои се при самиот врв и се борат за највисок пласман, актуелниот шампион ги понижи лацијалите во нивниот дом на „Олимпико“. Самиот старт на натпреварот не најави ваков резултат, но гостите имаа моќен финиш на првото полувреме кога набрзина дојдоа до водство од 2-0 преку Чалханоглу од пенал и дефанзивецот Димарко.

Во вториот дел сите удари на „нероаѕурите“ во рамките на голот завршија во мрежата на Проведел, а во листата на стрелци се запишаа Барела, Дамфирс, Карлос Агусто и Тирам.

Четата на Инѕаги со 34 бода е на третата позиција на табелата, Лацио со 31 го држи петтото место.