Ништо од „чудото од Истанбул“: Алонсо даде објаснување за минхенската „петарда“ во ЛШ

Букмејкерите и фудбалските експерти од најреномираните емисии за Лигата на шампиони му дадоа предност на Баер Леверкузен во големото германско дерби во осминафиналето, но реалноста ни покажа дека во ниту еден случај и во било какво сценарио не смее да се потцени великанот од Минхен.

Баерн покажа дека е далеку поискусен и поквалитетен тим од Леверкузен во овој момент и со вкупни 5:0 авторитативно се пласираше меѓу осумте најдобри, билет кој го завери со нова победа, овојпат со 0:2 на гостински терен.

Пред натпреварот на „БајАрена“, Чаби Алонсо најавуваше дека ќе ги мотивира своите фудбалери за пресврт со „чудото од Истанбул“, но такво нешто во ниту еден момент не беше реално, бидејќи Баерн беше поконкретен и на втората пресметка по почетните 3:0 од „Алијанц арена“.

Чаби Алонсо мораше да му честита на својот поранешен клуб за кој играше во играчката кариера, но излезе и со првите впечатоци за болната елиминаија како тренер во најелитното натпреварување.

– Не се предадовме, во првото полувреме се обидовме да направиме нешто и бевме блиску да го отвориме резултатот од прекини. Беше малку хаотично на теренот, но момците дадоа се што имаа. После првиот гол на Баерн, работите станаа исклучително тешки.

– Лигата на шампиони е натпреварување каде не смее да правите грешки, а ние направивме премногу, особено на првиот меч. Потребно ни беше нешто спектакуларно за пресврт, но не бевме ниту блиску до тоа. Не ни недостасуваше квалитет на овие два меча, ни недостасуваше ефикасност. Севкупно гледано, имаме неверојатен развој како тим и клуб во последните две години, но следниот чекор е оној најтешкиот. Сакаме да бидеме уште подобри и да се натпреваруваме со најдобрите и ќе одиме по тој пат. Не треба да се гледа се како катастрофа после ваков пораз, – изјави Алонсо.