Николовски блескаше на голот, ракометните кадети ја победија Италија за опстанок во елитата

Македонската машка кадетска репрезентација ја победи Италија (23:19) во натпревар од разигрувањето на Европското првенство во Црна Гора и ја оствари примарната цел на овој престижен турнир.

Нашите ракометни надежи со денешниот триумф ја искористија втората шанса за обезбедување опстанок во елитното друштво, па Македонија ќе има свој претставник и на следното издание на европските првенства во оваа конкуренција.

Избраниците на селекторот Наум Танески добро го започнаа натпреварот и направија солидна предност, но Италија возврати за резултат 11:11 по првото полувреме.

Во продолжението имавме и плус четири, противникот повторно се закани и дојде на минус еден, но македонската репрезентација го издржа притисокот и на крај стигна до важна победа.

Митев со 6 и Крстевски со 4 голови беа најефикасни во македонскиот состав, а фантастичен настап имаше пред се голманот Ѓорѓи Николовски кој собра 18 одбрани со 50% успешност.

Кадетите дополнително ќе го дознаат следниот противник во разигрувањето за место од 17 до 20. позиција.