Никола Митревски со овации пречекан во Дебрецин (Видео)

За „Дерби“ од Унгарија,
Ристе Влахов

Искусниот голман на македонската репрезентација, Никола Митревски се појави во базата во Дебрецин откако доби два негативни теста.

Лажно позитивниот тест направен во Скопје го спречи Митревски да и помогне на репрезентацијата на Македонија во првиот натпревар против Словенија, но сега ќе му биде на располагање на Кире Лазаров за следните натпревари против Црна Гора и Данска.

Митревски денеска пристигна во Унгарија и веднаш се приклучи на репрезентацијата, а видео од неговото појавување во ресторанот беше објавено на официјалната страна на Ракометната федерација на Македонија.

Останатите репрезентативци и стручниот штаб со овации го пречекаа голманот кој има одлична сезона во дресот на Порто и со сигурност ќе биде од голема помош во преостанатите натпревари на континенталниот собир.

Инаку, во првото коло Николче Митревски имаше одлична замена во Мартин Томовски кој беше една од најсветлите точки на натпреварот во кој собра вкупно 14 интервенции.