Никола Ѓорѓиев: Многу ми е жал и криво што не успеавме да ги израдуваме навивачите

Со бројните проблеми со повреди минатата недела, македонските одбојкари успеаја да освојат сет против Грција, но загубија со 3:1 во квалификацискиот натпревар за ЕП 2026.

На половина од патот до четврти континентален собир, Македонија има половичен биланс и реални шанси да се најде меѓу 24-те најдобри европски селекции.

Капитенот Никола Ѓорѓиев оценува дека во овој период не можевме повеќе.

„Јас сакам да и се заблагодарам на сите навивачи кои во сала ни ја пружија оваа поддршка, беше феноменално да се игра. Секоја чест за публиката, многу ми е жал што не успеавме да ја израдуваме. Оваа атмосфера беше подобра дури од таа на ЕП кое што го игравме лани. Многу ми е жал, многу ми е криво што не успеавме да ги израдуваме. Но во овој момент Грција беше подобра од нас.

Не е алиби, но имавме тешка недела. Савовски бронхопнеумониа, во четврток Лепидовски го свитка зглобот, во петок сабајле нашиот центар Манџуков во теретана се повреди на грбот, некоја несреќа.Ако е нешто добро одигравме машки, дадовме се од себе, но меѓутоа максимумот во овој момент е ова.“, кажа Ѓорѓиев.