Незаменливиот стартер на Ливерпул: Азар ме уништи на „Стемфорд Бриџ“, Траоре ме распарчи на делови

Енди Робертсон се претвори во еден од најдобрите дефанзивци во светот како стандарден стартер во тимот на Јирген Клоп, па со тоа Шкотланѓанецот доби статус на еден од најтешките противници за игра во Премиер лигата.

Сепак, има моменти и кога најдобрите патат на фудаблскиот терен и се наоѓаат во ситуација да се молат натпреварот да заврши што побрзо, а сега Робертсон издвои двајца противници кои добро ќе ги памети.

Пред да потпише за Ливерпул во 2017-та година, левиот бек три сезони настапуваше за Хул, а од тој период памети една епизода која тешко дека ќе ја заборави.

– Кога бев во Хул, играв против Азар кога беше прогласен за најдобар играч на годината. Можам да кажам дека ме уништи на „Стемфорд Бриџ“, навистина беше страшно. Тоа е натпревар кој вечно ќе го паметам и од кој мислев дека нема да можам да се опоравам, но за среќа успеав да се вратам на вистинскиот пат, – открива Робертсон во подкастот на Питер Крауч, а потоа се надоврзува на едно поскоро искуство од оваа сезона.

– Адама Траоре е уште еден претежок противник. Траоре ме распрачи на делови, мислам дека може да му даде 15 метри предност на секој дефанзивец и на крајот ќе ја добие трката, – завршува левиот бек.