Невообичаен епилог: Директните ривали за титулата во мак-футсалот победија со 75:1 и 62:2!

Пред да се влезе во завршната фаза од сезоната во Првата македонска футсал лига, јавноста во нашата земја остана зачудена од резултатите од последното коло, а за тоа се погрижија директните ривали за титулата.

КМФ Проект и КМФ Арбен Бајрами ќе водат жестока битка за трофејот до самиот крај, но очигледно почнаа да прават калкулации и за епилог во кој би се броела гол разликата.

Доказ за тоа се последните резултати кои ги остварија на своите натпревари, а кои дефинитивно се невообичаени и чудни кога е спортската пракса во прашање за натпреварување од највисок ранг.

КМФ Проект како гостин победил кај Енхалон со резултат 62:2 и тоа стои во официјалниот записник кој го објави ФФМ, на кој пишува дека резултатот на полувреме гласел 25:1.

Сепак, со уште поголема разлика победил скопскиот тим Арбен Бајрами, кој славел над Јувентус Серава со 75:1, а на полувреме водел со 34:1. Само за споредба, КМФ Проект на претходниот меѓусебен дуел го победи Енхалон со 4:0, а Арбен Бајрами славел над Јувентус Серава со 11:5.