Невил си ја призна грешката: Салах ми покажа дека воопшто не сум бил во право

Мо Салах стигна до 220-ти гол во кариерата како играч на Ливерпул и веќе некое време е трет најдобар голгетер во историјата на клубот, па многумина веќе го вбројуваат и како еден од најголемите кои некогаш го облекле црвениот дрес на „Енфилд Роуд“.

Египќанецот ги надмина сите оптимистички прогнози по направениот трансфер од Рома во 2017-та година, а сега во период кога не се знае дали ќе остане во Ливерпул и наредната сезона, познатите експерти почнаа да даваат се поголемо признание за бројките на Мо.

Салах прерасна во врвен голгетер и се уште прави разлика и во тимот на Арне Слот, па тоа го натера Гери Невил да признае дека имал целосно лоша проценка за квалитетите на Египќанецот пред неколку години.

– Ќе бидам искрен, никогаш не очекував да биде волку добар и волку брилијантен кога беше доведен од Рома. Мислев дека ќе си замине уште пред три, четири или пет години.

– Не верував дека ќе може да постигне толку многу голови колку што постигна во изминативе години. Не верував дека може да биде толку брилијантен и тој ми покажа дека сум имал целосно грешно мислење, – признава Невил.