Невил: Брзо ќе се заборави овој супер-тим на Арсенал ако не се случи една работа

Арсенал во недела ќе му гостува на Манчестер Сити на „Итихад“ и ќе има шанса со победа да избие на првото место, нешто што според Гери Невил би било многу важно за самодвербата на Микел Артета и неговиот тим кој трета година по ред се обидува да го симне Пеп Гвардиола од тронот во Премиер лигата.

Легендарниот десен бек на Манчестер Јунајтед во својата колумна за „Оверлап“ пишува за супер тимот на Арсенал кој игра на највисоко ниво со години наназад, но испорачува и една брутална констатација која сигурно ќе им боде во очи на верните навивачи од Северен Лондон.

– Ако овој супер тим на Арсенал не ја освои Премиер лигата или Лигата на шампионите, тогаш брзо ќе биде заборавен во фудбалската историја.

– Знам дека звучи грубо и брутално, но тоа е реалноста во елитниот спорт. Никој нема да ги памети добрите изданија на Салиба и Габриел во одбраната, или брилијантноста на Одегард и Рајс. Никој нема да ги памети и одбраните на Раја и клучните продори на Сака. Никој нема да памети ништо ако не направат една работа, а тоа е да освојат голема титула.

– Нема да има документарци за нив, никогаш нема да им се восхитуваат и нема да бидат почитувани. Историјата е непростлива кон оние кои завршиле втори, затоа мора да направат исчекор. Тоа што го правеа изминативе две години, сега треба да го надополнат. Премногу е рано да се збори дека неделниот меч на „Итихад“ е борба за титулата, но Арсенал мора да испорача јасна порака со победа во оваа фаза од сезоната, – пишува Невил.