Неверојатниот Роналдо уште еднаш ја спаси „главата“ на Солскјер, возбудливо реми во Бергамо (Видео)

Екипите на Аталанта и Манчестер Јунајтед одиграа одличен натпревар во Бергамо кој на крајот заврши без победник, со четири постигнати погодоци (2:2).

Манчестер Јунајтед ги навикна своите навивачи на трилер завршници, па така беше и вечерва кога Роналдо со гол во последните моменти од средбата донесе бод за „ѓаволите“ и со тоа ја спаси „главата“ на Оле Гунар Солскјер.

Аталанта на два пати водеше со головите на Иличиќ и Запата, меѓутоа Роналдо на два пати им ја скратуваше радоста, со голови во продолженијата на полувремето, односно на натпреварот.

Пораз за Манчестер Јунајтед уште еднаш сериозно ќе ја затресеше клупата на Солскјер, меѓутоа Роналдо му даде уште некое време „живот“ на тренерот на клубот од Манчестер.

Во вториот натпревар од истата група, Вилјареал со 2:0 славеше очекувана победа против тимот на Јанг Бојс.

Во оваа група Ф до крај ќе се води битка за тоа кој ќе оди во нокаут фазата. Во моментов Јунајтед и Вилјареал се на првите две места со по седум бода, Аталанта е трета со пет поени, додека Јанг Бојс иако има шанси, веќе е отпишан со три бода.

На останатите натпревари, Барселона дојде до тешка победа на гостувањето во Киев кај Динамо каде славеше со 1:0, а стрелец на единствениот погодок беше младиот Ансу Фати.

Баерн Минхен, пак немаше проблем против Бенфика која ја победи со 5:2 и го визираше пласманот во нокаут фазата. За втората позиција во оваа група ќе се борат Барселона и Бенфика.

Јувентус со 4:2 славеше против Зенит и со тоа обезбеди пласман во нокаут фазата, а овој резлутат значи дека и Челси кој претходно славеше против Малме исто така ќе се пласира во следната фаза.