Неверојатниот Хенеберг доби призание од ЕХФ за една мајсторија во Германија (Видео)

Себастијан Хенеберг постигна речиси половина од головите на Еурофарм Пелистер и имаше неверојатна ракометна симултанка во Диселдорф, која резултираше со втора победа на македонскиот претставник во Лигата на Европа.

Македонскиот вицешампион славеше против Мотор со резултат 30:33 во мечот во кој Данецот постигна дури 14 погодоци, а еден од нив доби посебно внимание од медија тимот на ЕХФ.

Ракометната Федерација го издвои цепелинот на Хенеберг и го смести на второто место во ТОП 5 листата од најубави голови на колото во второто по ранг европско натпреварување.

Бекот на Пелистер брилјираше во сите 60 минути, но овој погодок најдобра ја отсликува партијата која ќе ја памети уште долго, но на која ќе се сеќаваат и играчите на Мотор.

За битолскиот тим ова беше втора победа на четвртиот натпревар во Лигата на Европа, а интересно е тоа што и двата беа остварени на гостински терен.