Неверојатна партија на Димитријевиќ во Клаипеда, Македонија се распадна по неговата повреда

Македонската сениорска кошаркарска репрезентација доживеа уште еден пораз од Литванија во квалификациите за пласман на Евробаскетот во 2025 година.

Литванците пред три дена не добија во Скопје со 82:67, додека пак вечерва во Клаипеда славеа со 94:72. Резултатот на крајот е превисок ако се земе предвид се што се случуваше на овој меч во кој НБА партија имаше нашиот Ненад Димитријевиќ со 43 поени, 4 скока и 6 асистенции.

Меѓутоа тој се повреди во четвртата четвртина или поточно на шест минути до крајот по еден негов влез кој заврши со кош. Во тие моменти резултатот беше 75:67, а во неговото излегување, напуштање на паркетот со помош на медицинскиот тим ние комплетно се распаднавме и на крајот доживеавме убедлив пораз од 22 разлика.

Ниту еден друг наш кошаркар не беше двоцифрен, поточно вторите најдобри стрелци Крстевски, Стајиќ и Маслинко реализираа по 6 кошеви што доволно говори дека Димитријевиќ едноставно не можеше сам против Литванците.

Во следниот прозорец не очекуваат дуели со Естонија и Полска.