Несторовски би можел да си оди од Удинезе, но да остане во Серија А

Македонскиот репрезентативец и член на Удинезе, Илија Несторовски до крајот на јануарскиот преоден рок би можел да реализира неочекуван трансфер.

Имено, италијанските медиуми пренесуваат дека тимот на Сампдорија сериозно се загреал за ангажман на македонскиот напаѓач кој не добива голема минутажа во клубот од Удине и би бил отворен за преселба во нов клуб.

Дејан Станковиќ мака мачи да ја извади Сампдорија од калта, па клубот од Џенова е во зоната за испаѓање и до крајот на сезоната ќе води битка за опстанок во елитата.

Токму Несторовски бил посочен како едно од решенијата кои би можеле да го донесат потребното искуство за клубот на крај сепак да обезбеди опстанок. Освен Несторовски, Сампдорија притиска и за ангажман на Александар Драговиќ од Црвена Звезда, па до крајот на преодниот рок клубот би можел да ги обезбеди двете засилувања.

Во текот на денешниот ден требало да има средба меѓу челниците на Сампдорија и Удинезе на која конкретно ќе се разговара за трансферот на Несторовски. Досега нема информации како поминала таа средба која претходно беше најавена од италијанските медиуми.

Инаку, за Несторовски имало интерес и од неколку клубови од Серија Б како Реџина, Модена и Косенца.