Непогрешливиот Вардар му одржа лекција и на Голден Арт

Вардар игра фуриозно и максимално сериозно на стартот на новата сезона во македонската Суперлига, каде останува апсолутен лидер и единствен непоразен тим и по седум рунди.

Тимот на Недановски и Стоилов денеска без проблеми се справи и со ракометарите на Голден Арт, дури и во ситуација кога имаше нецелосен состав на располагање.

Работите станаа јасни уште во воведните 10-тина минути кога Вардар поведе со 8:1 на гостувањето кај Голден Арт, а иако домаќините се разбудија и стигнаа до достижни минус три, во вториот дел повторно беа вратени во реалноста.

Вардар покажа квалитет и со скратена ротација и на крајот извојува победа од 21:32, па така стигна до „седум од седум“ во Суперлигата.

Родригез и Николиќ постигнаа по осум гола за гостинскиот тим, додека кај домаќините Ончев имаше пет реализации.