Непобедливиот Кливленд стигна до 15:0, Далас знае да победува и без Дончиќ (Видео)

Кливленд без никаков сомнеж е најпријатното изненадување на стартот на сезоната во НБА лигата, па веќе некое време ривалите играат против Кавалирси со цел да ја спречат нивната импресивна серија.

И покрај таквиот тренд, Кливленд засега одолева на сите предизвици и рано утрово стигна до 15-та победа од стартот на сезоната, што прави да го гледаме вториот најдобар старт во историјата на НБА лигата.

Претходно во историјата, Вашингтон Кепитолс и Хјустон Рокетс се тимовите кои почнале сезона со ист учинок, а најдобрата серија без пораз на старт на една сезона ја има Голден Стејт во 2015-та година (24:0).

Кливленд утрово стигна до 15-ти триумф во пресметката со Шарлот Хорнетс, славејќи на домашен терен со 128:114 благодарение на тимската игра.

Дури четворица играчи на Кавалирси ја надминаа границата од 20 поени, па така Гарланд постигна 25, Џером 24, Мобли 23, а Ален 21 поен.

Од натпреварите рано утрово, навистина интересно беше во Оклахома, каде истоимената екипа на домашен терен беше поразена од Далас (119:121).

Гостите играа без повредениот Лука Дончиќ на овој натпревар, но Маверикси покажаа дека знаат да играат и без главната ѕвезда која отсуствуваше поради проблем со коленото.

Вашингтон со 27 и Ирвинг со 23 го надокнадија отсуството на Дончиќ, додека најефикасен на теренот беше Гилџес-Александер со 36 поени од редовите на Оклахома.

НБА резултати:

Минесота – Феникс 120:117
Индијана – Мајами 119:110
Кливленд – Шарлот 128:114
Мемфис – Денвер 105:90
Портланд – Атланта 114:110
Вашингтон – Детроит 104:124
Чикаго – Хјустон 107:143
Њујорк – Бруклин 114:104
Оклахома – Далас 119:121
ЛА Клиперс – Јута 116:105