Нема да може да се расфрла со пари: Њукасл има ограничени финансиски средства за летниот преоден рок

Њукасл имаше одлична сезона во која обезбеди топ четири пласман во Премиер лигата, а со тоа и место во Лигата на шампионите во кампањата 2023/2024.

Премиерлигашот по подолга пауза одново ќе игра во елитното натпреварувања и навивачите очекуваат клубот да биде супер активен во престојниот летен преоден рок, да донесе играчи со кои ќе ја засили конкуренција и ќе може да направи дополнителен исчекор во следната сезона.

Меѓутоа според „Дејли Мејл“, тимот од северот од Англија нема да може да се расфрла со пари, а причината за тоа е финансискиот фер плеј.

Тренерот Еди Хау ќе има на располагање буџет од 75 милиони фунти, а главна цел ќе биде ангажманот на Џејмс Медисон од Лестер. Други имиња кои се споменуваат се Скот Мектоминеј од Манчестер Јунајтед, Моисес Каиседо од Брајтон, Конор Галагер…

Њукасл потроши 250 милиони фунти во претходните три преодни рока, откако клубот доби богати сопственици. Меѓутоа составот од „Сент Џејмс Парк“ не може да ја мине границата од 80 милиони евра, односно да се случи ова ќе мора да продаде некој од играчите.