Нејмар се враќа во бразилската репрезентација по пауза од 17 месеци

Враќањето и квалитетните настапи во редовите на Сантош му донесоа и повик за настап во националниот тим на Нејмар, кој се враќа во редовите на „селесао“ по долга пауза.

Повредите го оддалечија Нејмар од националниот тим, но 17 месеци подоцна, тој ќе биде во комбинација за квалификациските дерби средби со Колумбија и Аргентина.

Нејмар ја заработи тешката повреда на коленото настапувајќи токму за Бразил на дуелот со Уругвај во 2023 година, по што му следуваше долга пауза и неуспешен престој во редовите на Ал Хилал.

По враќањето во матичниот клуб, Нејмар стигна до три гола и три асистенции на седум натпревари и очекувано доби повик и за настап во националниот тим, каде ќе се обиде да помогне за што подобри резултати на тешките натпревари во квалификациите за СП 2026.

Големата бразилска ѕвезда на овој начин ќе има можност да му се приближи и на рекордерот Кафу, кој има 14 настапи повеќе од Нејмар и е единствениот играч во историјата на националниот тим со повеќе настапи од играчот на Сантош.