Недановски: Подготвени сме за новата сезона, се освен титула ќе биде неуспех за Вардар

Екипата на Вардар 1961 утре ќе ја започне новата сезона и тоа со тежок меч, гостување во Автокоманда кај Алкалоид, тим кој пред неколку дена го освои трофејот во Супер Купот на Македонија.

Ова ќе биде прв сериозен испит за „црвено-црните“ кои имаат највисоки амбиции во кампањата 2024/2025 и тоа го потврди тренерот Владо Недановски.

-Спремен е Вардар за новата сезона, Направивме добри подготовки, одигравме неколку контролни средби, настапивме на два турнири. Целите остануваат исти, без разлика дали Вардар има или нема играчи, и какви се тие, целите се секогаш тие. И претходните две сезони бевме доста блиски до титулите, а ги загубивме заради тој недостаток на ротација. Сега не можеме да кажеме дека немаме играчи. Имаме над 20 играчи кои се идентични по квалитет и можат да покријат добро и во напад и во одбрана. И сега се освен освоена титула ќе биде неуспех за овој Вардар.

-И годинава се може да реши еден меч. Има многу жешки терени на кои ќе треба да се игра, има добри екипи, и Еурофарм Пелистер и Алкалоид, па и Охрид. Алкалоид покажа дека созрева, игра подбро. Игравме со нив во Охрид, на турнир, но овој меч во Гевгелиај за Супер купот беше сосема друг. Се работи за квалитетен тим. Ние стартуваме со нив, тоа прераснува во градско деби, и ќе направиме се да победиме.

-Според мене најважно е домашното првенство, да можеме да се вратиме во лигата на шампионите. Ќе имаме многу мечеви сезонава, но имаме и долга клупа и квалитетни играчи, -рече стратегот за официјалниот веб сајт на клубот.

Недановски е задоволен од засилувања, доведените играчи во изминатиов период од кои последен беше бекот Вуко Борозан.

-Добивме големо име, и порано играл кај нас. Мислам дека имаме доволен број на играчи, Ростерот засега е затворен. Имаме и повеќе млади играчи кои ќе треба да добијат шанса, и Стојановски и Стаменковиќ. Тие сигурно ќе играат на некои мечеви. Гогов е веќе втор голман, и сериозно се бори за местото и во почетниот состав. Останува на сите нас да работиме напорно, -порача предводникот на вардарци.