Не е само Копмајнерс: Уште една ѕвезда на Аталанта сака да замине од Бергамо

Аталанта ја отвори новата сезона со престижниот европски Супер куп каде загуби од Реал Мадрид, а тренерот Џан Пјеро Гасперини и натаму нема целосно јасна слика со кој состав ќе располага во наредниот период.

Клубот од Бергамо веќе се пофали со фактот дека успеа да го договори Лазар Самарџиќ од Удинезе, кој сигурно ќе биде сериозно засилување, но од друга страна се уште не го дефинира статусот на играч како Теун Копмајнерс, а веќе има и втор фудбалер во слична ситуација.

Откако Холанѓанецот најави дека сака да направи трансфер во Јувентус, денеска „Скај Спорт Италија“ пренесе дека во составот на Аталанта за дуелот со Лече нема да биде и Адемола Лукман.

Одличниот офанзивен фудбалер имаше важна улога на клучните натпревари минатата сезона, но медиумот тврди дека побарал да не биде вклучен на премиерата во Серија А, затоа што преговара за трансфер.

Неофицијално, потписот на Лукман ќе го добие ПСЖ, а Нигериецот роден во Англија очигледно добил понуда која не се одбива од францускиот шампион.