Наследникот на Скубе: Вардар е на добар пат да обезбеди среден бек од Португалија (ВИДЕО)

Македонскиот ракометен прволигаш Вардар се обидува да направи конкурентен и силен тим за наредната кампања, па додека се очекува официјална потврда од клубот за некои зделки кои се веќе договорени, заклучени, сега ни доаѓа информацијата дека „црвено-црните“ се на добар пат да го обезбедат наследникот на Скубе.

Се работи за Мигуел Мартинс Соареш кој според физичките предиспозиции не е ист како Скубе со оглед на тоа што е висок 192 сантиметри, но игра на истата позиција среден бек, организатор на играта.

Се работи за 22-годишен португалски репрезентативец и член на Порто кој на Вардар годинава му даде 7 гола во двете пресметки во ЛШ или вкупно во ова натпреварување дојде до бројката од 43. На ЕП кое пак се одржа на почетокот на годинава во  Австрија, Норвешка и Шведска беше автор на 19 голови.

Додека се очекува потврда за Мартинс како и голманот Робин Кантегрел, вреди да се спомене дека Вардар потпиша нови договори или поточно ги задржа Стоилов, Ристовски, Мишевски, Дибиров, Чупиќ, Дисингер и Калараш.