Направи големо изненадување, па доби „шут карта“: Клосе заработи отказ во првиот тренерски предизвик

Германската фудбалска легенда, Мирослав Клосе реши да му се посвети на тренерскиот занает по завршувањето на кариерата, но тој не се прослави во својата прва позначајна задача.

По епизодите во Германија и Баерн Минхен (како асистент), Клосе доби задача да го води австрискиот прволигаш Алтах, но по 22 кола оваа екипа е на последното место на табелата со 17 бода по што управата реши да реагира и да му врачи отказ на некогашниот ас на Вердер, Лацио и Баерн Минхен.

Занимливо е тоа што отказот доаѓа само еден ден откако Клосе со Алтах направи вистинска сензација и остана непоразен на гостувањето кај актуелниот шампион Салцбург (1-1).

Останува да се види како овој неуспешен предизвик ќе влијае врз кариерата на Миро, односно колку време ќе мора да чека за да добие нова шанса да ги покаже тренерските квалитети.