Наполи во „војна“ со Осимен: Нигериецот остана без „деветката“ и без регистрација за Серија А

Раководството на Наполи е изиритирано од однесувањето на Виктор Осимен во завршницата на преодниот рок и реши да му испрати брутален одговор за начинот на кој Нигериецот менаџираше преку своите агенти и на крајот остана без посакуван трансфер.

Осимен беше поврзуван со Ал Ахли, но Наполи ја одби таа понуда поради фактот што клубот од Саудиска Арабија одбил дополнителни 5 милиони евра во вид на бонуси, за на крајот фудбалерот да го одбие Челси сметајќи ја финансиската понуда на премиерлигашот за понижувачка.

Аурелио Де Лаурентис нема да му го прости ова на Осимен, па денеска стана јасно дека голгетерот ќе биде „замрзнат“ и Наполи не го регистрирал за настап во Серија А.

Покрај тоа, одземена му е и „деветката“ на напаѓачот и дресот му е отстапен на неговиот наследник Ромелу Лукаку.

Претседателот на клубот е синхронизиран за оваа одлука со тренерот Антонио Конте, кој во моментов е задоволен од составот бидејќи го доби Лукаку како што и бараше уште од почетокот на преодниот рок.