Наполи остана без важен првотимец за дербито со Интер

Наполи доживеа неочекуван пораз од Комо и ја загуби првата позиција на табелата во Серија А, а Антонио Конте се соочи и со неколку повреди кај важни играчи.

Последната негативна вест за Наполи е повредата на Андре-Франк Ангиса, еден од клучните играчи во средниот ред, кој настапи во финишот на дуелот со Комо, доволно за да заработи незгодна повреда.

Ангиса има мускулна повреда и по денешните прегледи, Наполи потврди дека му следува принудна пауза, што значи и прескокнување на дербито со Интер.

Конте одлучи Камерунецот да игра само триесет минути против Комо за да го намали ризикот од жолт картон кој му носеше автоматска суспензија, а иронично Ангиса сега ќе го пропушти дуелот поради повреда.

Натпреварот Наполи-Интер е закажан за во сабота од 18 часот, а Интер во моментов има бод предност.