Нагелсман потврди дека му ја одземал капитенската лента на Нојер: Лично го известив за тоа

По победата со пресврт против Америка, Германија ја заврши својата мини турнеја во САД со реми против Мексико рано утрово, а по натпреварот, Јулијан Нагелсман одговори на прашањето кое стана топ тема во јавноста.

Новиот германски селектор е решен да направи серија промени во селекцијата по ужасниот период кој го имаше тимот под водство на Ханси Флик, но една од нив ќе биде навистина тешка за Мануел Нојер.

Искусниот чувар на мрежата со години беше капитен на националниот тим, но Нагелсман сега вели дека капитенската лента ќе остана на раката на Гундоган и во ситуација кога Нојер ќе се врати во тимот.

Во моментов, Нојер се уште се рехабилитира од тешката повреда која ја заработи на крајот на минатата година, а Јулијан откри дека голманот лично од него бил известен за одлуката која ја донел.

– Планот е да му дадеме континуитет на Гундоган со капитенската лента. Точна е и информацијата дека разговарав со Нојер на оваа тема. Му се јавив лично на телефон и реагираше доста добро. Тој е професионалец и ќе биде дел од селекцијата кога ќе се врати на теренот, – откри Нагелсман за „Билд“.