Нагелсман: Имав непријатен разговор со Тер Штеген во март

Марк Андре Тер Штеген конечно дочека да биде прв голман на Германија, па сега дефинитивно ќе има вистинска шанса да се докаже на еден голем турнир во дресот на националниот тим.

Голманот на Барселона многу долго беше во сенка на Мануел Нојер кој пред извесно време соопшти дека му го отстапува местото на Тер Штеген, а на крајот трпението донесе награда за Марк која според многумина требаше да дојде доста порано.

Јулијан Нагелсман откри дека имал непријатен разговор со Тер Штеген пред почетокот на Европското првенство во Германија, но неколку месеци подоцна, ситуацијата изгледа доста подобра за него, но и за чуварот на мрежата.

– Тер Штеген беше многу добар против Унгарија и одбрани некои чисти шанси. Тој е важен играч за нас, со години е прв голман на Барселона и капитен на тој голем клуб. Знаеме дека со него имаме квалитет и сигурност на голот.

– Ќе бидам искрен, тој навистина предолго беше втор голман на Германија. Конверзацијата која ја имавме во март не беше пријатна. Имав страв дека ќе му дојде преку глава и дека ќе каже „нема да бидам повеќе дел од ова“! Ќе го сфатев да го направеше тоа, предолго беше во втор план, но сега има вистинска шанса. Очекувам да остане здрав и да има добар мундијал за две години, – изјави Нагелсман.