Наезда на глувци го намали рејтингот на „Олд Трафорд“, санитарната инспекција побарала итна реакција

Кристијано Роналдо испорача брутален рафал кон раководните структури на Манчестер Јунајтед кога си заминуваше од клубот, бидејќи како легенда на „црвените ѓаволи“ си даде за право да зборува за очајната инфраструктура која владее во тренинг центарот, но и на стадионот.

Португалецот тогаш нагласи дека клубот не вложил ниту едно евро во подобрување на условите од денот кога првпат си замина од театарот на соништата, а како што одминува времето, овие негови изјави се повеќе добиваат на значење во јавноста поради доказите кои пристигнуваат од самиот стадион.

„Олд Трафорд“ прокисна на минатосезонското дерби со Арсенал и една од трибините служеше за потсмев на социјалните мрежи, но сега топ тема во Англија е присуството на глувци на култниот стадион во Манчестер.

Вонредната санитарна инспекција утврдила низа пропусти во просториите на стадионот и биле пронајдени траги и измет од споменатите глодари, поради што „Олд Трафор“ како клуб добил една од најниските оценки.

Иако присуството на глувци не било утврдено во близина на кујната каде се подготвува храната, санитарната инспекција издала барање за итни подобрувања на условите на стадионот, па затоа од можни пет, дала само две ѕвездички за целокупната хигиена на „Олд Трафорд“.

Намалувањето во рејтингот доаѓа во период кога на големо се зборува за реновирање на култниот стадион, па јасно е дека тоа треба да претставува еден од приоритетите на новиот косопственик Џим Ретклиф кој се задолжи да ги решава сите проблеми и пропусти кои ги направија Глејзерови.