Надал може да ја брани титулата на Ролан Гарос без публика

Рафаел Надал е рекордер според бројот на трофеи на Ролан Гарос, но можеби годинава првпат ќе се обиде да освои трофеј без поддршка од своите фанови во Париз.

Организаторите веќе го одложија почетокот на грен-слем турнирот за 20 септември, но и тој датум не носи доволно гаранции дека ќе може да се одржи без компликации од коронавирусот.

Претседателот на Француската тениска федерација, Бернар Гвидичели денес најавил дека Ролан Гарос може да се одржи и без публика.

– Организирањето на турнирот без публика ќе овозможи да ја намалиме економската штета. Парите од телевизиските права и спонзорите не се за потценување, – изјавил Гвидичели.

Иако нема официјална потврда, медиумите во Франција најавија дека турнирот сепак ќе започне на 27 септември, а Гвидичели не го демантирал ова, потенцирајќи дека една недела нема да направи голема разлика.