Надал ги демантираше информациите од Монте Карло: За жал, тоа не е вистина

Рафаел Надал се повреди на Австралија Опен и од тој момент нема одиграно ниту еден официјален меч, а последните проценки велеа дека тој ќе се врати на терените за турнирите на земјена подлога.

Мастерсот во Монте Карло избрза со информацијата дека Шпанецот ќе се врати во кнежевството и ќе го има својот прв турнир по Мелбурн во месец април, но Надал сега го демантираше ова во интервјуто за „Марка“ и нагласи дека во ниту еден момент не споделил таква информација.

– Не знам од каде е таа информација дека сум се пријавил за Мастерсот во Монте Карло. Ако беше вистина, ќе го потврдев тоа, но за жал не е така.

– Во моментов одам по предвидениот пат за рехабилитација и вистината е дека не знам кога ќе играм. Во фаза сум на интензивна работа и ако знаев кога ќе се вратам, самиот ќе го кажев тоа.

– Не можам да потврдам дека ќе играм во Монте Карло, работите се развиваат од ден во ден. Претпочитам да кажам работи кога се стопроцентно сигурни, а тоа сега не е така, – изјави Надал.