Надал: 2020 година е загубена, повеќе ме загрижува нешто друго

Рафаел Надал е исклучително загрижен за здравствениот и економски потрес кој го направи коронавирусот, но Шпанецот истовремено важи и за најголем песимист кога е во прашање рестартирањето на сезоната во тенисот.

Најдоброто сценарио вели дека сезоната ќе продолжи во месец август, што ќе овозможи да се одиграат турнирите на американската турнеја, но и два грен слем турнири, оној во Њујорк и оној во Париз.

Сепак, сето ова е само замисла при создавање на поволни услови за често патување и безгрижно организирање на турнири, нешто во што не верува светскиот рекет број два кој практично ја оцени оваа сезона за завршена.

– Се надевам дека тенисот ќе се врати пред крајот на годината, но за жал, мислам дека тоа не е возможно. Повеќе ме загрижува нешто друго. Повеќе ме загрижува Австралија Опен во 2021-ва година, отколку крајот на оваа година.

– Мислам дека 2020-та е загубена година. Се надевам дека ќе почнеме да играме наредната година, – изјави Надал за „Ел Паис“.