Начо и Асенсио го пробија „бункерот“ на Кадиз (Видео)

Карло Анчелоти направи шест измени во стартниот состав и ротираше со оглед на згуснатиот распоред на натпревари, но иако Реал Мадрид долго се мачеше, на крајот успеа да го пробие „бункерот“ на Кадиз.

Гостите од Мадрид доминираа во секој сегмент од фудбалската игра и создадоа безброј шанси пред да постигнат прв гол, а Родриго промаши и празен гол од непосредна близина.

На 18 минути пред крајот, отпорот на домаќините конечно го урна Начо, кој изреагира како извонреден голгетер и од дистанца успеа да го матира голманот на Кадиз за 0:1.

Набрзо по голот на стоперот, се осоколи да шутира и Марко Асенсио, кој со прецизен удар го зголеми водството и практично ја потврди очекуваната победа на Реал Мадрид.

Ова секако беше добра подготовка за реванш мечот кој следи во Лигата на шампионите против Челси, а одлична вест е што одмор добија неколку стартери како Винисиус, Модриќ, Крос и Камавинга.