МЗТ запиша уште еден пораз со драматична завршница во АБА лигата

МЗТ Скопје имаше напад за победа, но истиот не успеа да го реализира и мораше да се соочи со уште еден пораз во АБА 2 лигата.

Македонскиот првак денеска загуби од Хелиос со 68:67, во натпревар на кој домаќините направија предност во првите два периода, но МЗТ успеа да фати приклучок во продолжението.

МЗТ постигна само 26 поени до полувремето, но ја подобри реализацијата по паузата, за во финишот да има и предност, која сепак не успеа да ја задржи до крајот.

Обидот за шут за победа на Брендон Слај не беше успешен, па домаќините се израдуваа на нова победа во регионалното натпреварување, додека МЗТ забележа трет пораз по ред.

Едвин со 16 и Слај со 15 поени беа најефикасни кај скопската екипа, додека во редовите на победникот, Кнежевиќ го заврши натпреварот со 16 поени.