МЗТ со победа над Куманово закажа полуфинална пресметка со Академија ФМП

МЗТ Скопје го отвори својот настап на завршниот турнир од кошаркарскиот куп со сигурна игра и победа над Куманово (100:84).

Фаворитот од почеток ја имаше резултатската контрола, првиот период го доби со 24:13, а веќе на полувреме имаше петнаесет поени позитива.

Куманово успеа да го подигне нивото на својата игра во третиот период, па во последната решавачка четвртина влезе со достижна негатива и резултат 73:67.

На 6:46 минути до крајот МЗТ имаше водство од 79:77, но оттука започна нова серија на фаворитот, па на крајот „аеродромци“ остварија убедлива победа со 100:84.

Стојановски со 20 и Гравет со 16 поени го предводеа МЗТ, додека во редовите на Куманово Ливингстон реализираше 28 поени, а го следеше Марковски со 18 поени.

Со триумфот на МЗТ, комплетирани се и полуфиналните двојки за утрешната програма, па следен противник на избраниците на Дарко Радуловиќ ќе биде Академија ФМП, додека Работнички за противник ќе го има тимот на Еуро Никел.