МЗТ се мачеше, но го скрши отпорот на жилавиот Кожув

Кожув се покажа во жилаво издание и успеа да го намачи актуелниот македонски шампион, но сепак во завршницата остана без доволно ресурси да се носи со МЗТ Скопје кој победи со 69:63.

Во натпревар во кој видовме доста водства на двата тима, до израз дојде мирот и искуството на кошаркарките на МЗТ Скопје, кој со подобра и поефикасна завршница се изборија за тесна победа против тимот од Гевгелија.

Иако звучи чудно, како клучна за МЗТ се покажа серијата од 5:0 на стартот на последната четвртина, бидејќи од тој момент, „металците“ постојано го одржуваа водството и практично немаа проблем до крајот на мечот.

Прифатливо за нив беше и тоа што последниот период беше крајно неефикасен, бидејќи во вкупно 10 минути, МЗТ постигна 12, а Кожув 9 поени.

На останатите два натпревари во Првата кошаркарска лига, ТФТ го победи Вардар со минимални 80:79, додека Феникс беше поуспешен од Гостивар со 74:66.