МЗТ покажа карактер против Будуќност: Се врати од „минус 19“, но немаше сили за победа

МЗТ Скопје за жал претрпе нов пораз во АБА лигата, но денеска македонскиот претставник покажа голем карактер и малку фалеше да направи огромно изненадување против Будуќност.

Тимот од Црна Гора кој е четврти на табелата го диктираше темпото во најголем дел од мечот, стигна до максимални плус 19 на средина на третата четвртина, но на крајот мораше да се испоти за да си замине со цел плен од Скопје.

Аеродромци презентираа борбен дух кој е одлика за националниот шампион и успеа да направи неверојатен кам-бек во мечот, но на крајот снема сили во клучните и пресудни моменти.

По негативата од минус 19, МЗТ двапати имаше егал во четвртиот период со 76:76 и 78:78, но вложениот труд и заморот си го направија своето и Будуќност имаше повеќе нерви и свежина во завршните моменти.

На крајот, фаворитот победи со 86:90 во натпревар во кој МЗТ покажа две лица, но кој сигурно ќе донесе и позитивни вибрации поради тоа што кошаркарите денеска сфатија дека можат да се носат и со поквалитетен противник.

Војдан Стојановски со 20 и Абу со 19 поени беа најдобри во нашиот тим, додека Бел Хејнс беше најдобар на паркетот со 22 поени и 6 асистенции.