МЗТ ја отвори новата сезона со „стотка“ и петти трофеј во Суперкупот

СРЦ Кале денеска беше домаќин на двете финалиња во Суперкупот, па откако Баскет Кам го грабна првиот трофеј во женска конкуренција, на ред дојде големото дерби во машка конкуренција.

МЗТ Скопје ја оправда фаворитската улога во дуелот со ТФТ и ја отвори новата сезона на домашна сцена со „стотка“, победувајќи го тимот на Тафталиџе со резултат 100:82.

Актуелниот македонски шампион го диктираше темпото на Кале и покажа дека се уште е најквалитетен тим во нашата земја, односно тим кој сите ќе сакаат да го победат и во новата натпреварувачка сезона.

МЗТ многу рано дојде до двоцифрена предност и имаше комотно водство на полувремето, па иако ТФТ успеа да се приближи пред крајот на последниот период, завршната четвртина сепак не донесе голема возбуда.

„Штрковите“ демонстрираа сила и се изборија за комотна победа на мечот кој го носи првиот трофеј во новата сезона, што за МЗТ е петта титула во Суперкупот.

Мицовиќ беше најефикасен во МЗТ Скопје со 27 поени, а по 18 уфрлија Дамјан Стојановски и Мајк Кафи. Андерсон беше најдобар во поразениот тим со 20 поени и 5 скока.