МЗТ го „оддува“ Кожув и го освои 13. Куп трофеј

Екипата на МЗТ Скопје по 13. пат во својата историја успеа да го освои Купот на Македонија и тоа откако вечерва во салата „26 април“ во Гевгелија го совлада домаќинот Кожув со 86:61.

Составот од скопски Аеродром одигра уште еден квалитетен, доминантен меч во кој не му дозволи на противникот да се надева на изненадување. Во претходните две „рунди“ МЗТ лесно се справи со Работнички и Пелистер, а денеска имаше апсолутна контрола на резултатот и играта од првата до последната четвртина.

По 20 минути водеше со 42:27, по три четвртини резултатот беше 63:49, а на крајот плус 25 за „штрковите“.

Маслинко кој ја понесе наградата МВП беше прв стрелец со 17 поени, Крстевски уфрли 16, а Војдан 12 кошеви.

Кај поразените се издвои Стевановиќ со 20 поени.