Мурињо по потврдата дека странски судија ќе дели правда на дербито со Галатасарај: Правилна одлука

Жозе Мурињо не го криел задоволството од фактот што Турската фудбалска федерација решила да го исполни барањето на неговиот клуб Фенербахче, па понеделничкото дерби со Галатасарај ќе биде водено од странски судии.

Словенецот Славко Винчиќ кој е дел од елитната група судии на УЕФА е делегиран за долго очекуваното дерби во Истанбул, со што двете екипи ќе може максимално да се концентрираат на својот настап.

Изминатиот период Фенербахче и Мурињо имаа многу забелешки на судиите, обвинувајќи ги за двоен аршин во однос на одлуките кои се носат на натпреварите на Галатасарај, па ова ќе биде прво големо турско дерби со странски судии.

– Донесена е правилна одлука, тој е топ судија и тоа ќе влијае позитивно на кредибилитетот на дербито.

– Среќен сум поради одлуката, бидејќи фер плејот секогаш мора да биде приоритет. Двете екипи сакаат да победат и се надевам дека ќе испорачаме квалитетен натпревар, – рекол Мурињо.

Галатасарај го критикуваше потегот и ја опомена федерацијата дека прави непотребен преседан, но не успеа да го блокира ангажирањето на Винчиќ за дербито во понеделник.

Галата ќе биде домаќин на натпреварот кој се игра од 18 часот, а го дочекува со шест бодови предност во однос на Фенербахче.