Мурињо испровоциран од новинарско прашање: Не планирам да слушам некој како тебе

Жозе Мурињо бил расположен за комуникација со новинарите на денешната прес-конференција во пресрет на новиот настап на Рома, но најавувајќи го дуелот успеал да влезе и во конфликт со еден од претставниците на медиумите.

Португалецот најпрвин разјаснил каква е ситуацијата со засилувањата и дали фановите конечно ќе го видат тандемот Лукаку-Дибала на терен.

– Лукаку ќе биде стартер и нема да биде изненадување ако одигра цел натпревар, додека Дибала исто така ќе има минутажа, но мислам дека не е подготвен за цел дуел. Пауло сака да игра и ќе стартува во тандем со Лукаку.

– Проблем беше што имав многу малку играчи на располагање додека траеше паузата, а Пелегрини и Манчини не се целосно подготвени, – рекол Мурињо.

На крајот, Португалецот бил испровоциран од прашањето на новинарот кој го прашал дали жали што Рома играла предефанзивно на дуелот со Милан.

– Мислам дека важна работа за формулата за успех е да не ги слушаш луѓето кои се помалку способни од тебе. Слушањето е важно во обидот да напредуваш, но ти никогаш не си седел на клупа и немам намера да те слушам, – изјавил Мурињо.