Мурињо и Лотито режирале циркус во подтрибинскиот простор на „Олимпико“

Жозе Мурињо ја отслужуваше казната од два меча и на големото римско дерби против Лацио, но поради специјална дозвола од луѓето во Федерацијата, добил шанса да биде дел од финалниот чин на натпреварот по последниот судиски свиреж.

Португалецот се нашол во подтрибинскиот простор за да ги теши своите фудбалери по минималниот пораз од 1:0, но тука бил и претседателот на Лацио, со кого влегол во подрска вербална расправија.

Како што јавуваат „Ил Месаџеро“ и „Газета дело Спорт“, се започнало со провокативна прослава на Ромањоли пред соблекувалната на Рома, по што претседателот на Лацио се нашол во близина и спречил поголемо недоразбирање меѓу неколку фудбалери.

Ваквата реакција на Лотито сепак не наишла на позитивен одговор од Жозе Мурињо, кој му порачал на првиот човек на противничкиот тим да не се меша кадешто не му е работа и дека местото не му е близу до соблекувалните.

На ова, рамнодушен не останал и Лотито, кој имал што да му врати на Португалецот….

– Јас сум претседателот на Лацио, кој си ти? Ова е мојот дом, а ти воопшто не треба да бидеш тука, – му возвратил нервозниот Лотито на Жозе.