Муратоглу за тоа кој може да им се закани на Ѓоковиќ и Надал: Не е само моќен, туку и супер прецизен

Пред нас е најпрестижниот грен слем Вимблдон, турнир на кој најголеми фаворити за пехарот се Новак Ѓоковиќ и Рафаел Надал.

Тоа го велат обложувалниците, дел од тениските експерти со тоа што повеќе од јасно е дека секогаш има простор за изненадувања, односно асови кои можат да дојдат до самиот крај со оглед на тоа што мечевите на трева секогаш се посебни и специфични.

Патрик Муратоглу како тениски стручњак многу добро ги знае условите на Вимблдон и што носат битките во Лондон, па така според него Матео Беретини е еден од играчите кои важат за фаворити за пехарот.

Италијанецот минатата година играше во финалето, а годинава е во добра форма пред турнирот и доказ за тоа се триумфите во Штутгарт и Квинс.

-Прекрасно е да се види Беретини повторно на трева. Мислам дека тоа ќе биде вистинска закана за Ѓоковиќ и Надал поради својот стил на игра. Тој не е само моќен, туку и суперпрецизен. Неговиот форхенд е еден од најсилните. Во своите сервис гемови, ако му ја вратат топката со ритерн, Матео го наоѓа својот форхенд и го става противникот во одбрана или го погодува винер.

-Иако неговиот бекхенд е послаб удар, Матео има добар слајс, идеален за трева. Тој го користи за да противниците му вратат повисока топка, давајќи му така шанса за форхенд, -истакна Патрик во својата анализа.