Мунуера Монтеро и Белингам со различни верзии за црвениот картон, Џуд може да заработи жестока казна

Реал Мадрид не успеа да слави на гостувањето кај Осасуна на „Ел Садар“, но ремито од 1-1 може да биде најмал проблем за актуелниот првак затоа што на подолго време може да остане без Џуд Белингам.

Англискиот репрезентативец заработи директен црвен картон во 39 минута, а судијата Хосе Луис Мунуера Монтеро во своето објаснување за казната посочил дека ја доделил затоа што играчот го навредил и му порачал “Fuck you”.

Со ова не се согласуваат во таборот на Реал и порачаа дека се работело за недоразбирање, односно комуникациска грешка.

-Ако го пoгледнете видеото, можете да видите дека не е исто како што пишува во извештајот, се надевам дека Федерацијата ќе го земе тоа во предвид. Никого не сум навредил, тоа јасно се гледа на видеото, не му кажувам ни директно на судијата, си го кажувам себеси. „Тоа беше недоразбирање, јасна грешка на судијата.

-Никогаш не сум го навредил судијата, мило ми е што гледам дека има видеа кои ја покажуваат реалноста и покрај судискиот извештај. Овде сум да им се извинам на моите соиграчи затоа што денеска ги доведов во тешка ситуација, -истакна Белингам.

Ако се утврди вина кај Џуд тогаш тој според правилата може да заработи голема казна, суспензија од четири до дванаесет натпревари.