Мукаетов си посака една убава желба пред СП во Хрватска, на потег се избраниците на Лазаров

Ракометната Федерација на Македонија ја продолжи соработката со својот верен партнер „Телеком“ и го потврди тоа на денешната прес-конференција, на која со свои импресии се јавија и првиот човек на македонскиот ракомет, како и селекторот на националниот тим.

Живко Мукаетов со години наназад направи ракометот да биде и повеќе од одржлив спорт во Македонија, па сега пред новото Светско првенство во Хрватска си посака и една голема желба како долгогодишен лидер на Федерацијата.

– Навистина ми е мило што уште една година започнуваме со подготовки за настап на големо првенство, во случајот Светското првенство кое набрзо е на програмата.

– Голема благодарност до Телеком кој останува партнер на македонската Федерација и најсилната репрезентација, а во периодот кој следи, очекуваме голем број македонски фанови да заминат за Хрватска. Ги повикуваме да дојдат во што поголем број бидејќи очекуваме многу пријатни моменти.

– Моја желба е да останеме најмалку 12 дена, а тоа значи дека сме завериле пласман во главната рунда натпревари. Ако се прашувам јас лично, посакувам најмалку три победи.

Македонија своите натпревари ќе ги игра во Вараждин, а во групната фаза се најде во групата во која се Унгарија, Холандија и Гвинеја.