Мота посакува двајца играчи со кои соработуваше во неговиот претходен клуб Болоња

Тиаго Мота си го обезбеди ангажманот во Јувентус со одличната сезона во Болоња, а сега посакува да обезбеди нова соработка со две потврдени имиња од својот претходен клуб.

Јувентус има многу проблеми со повредени играчи и сигурно ќе ангажира дефанзивец во јануарскиот преоден рок, но италијанските медиуми потенцираат дека е можно освежување и на други позиции.

Мота веќе му потенцирал на директорот Кристијано Џунтоли кои се неговите приоритети, а во случајов тоа се Луис Фергусон и Џошуа Зиркзе.

Фергусон постигна 13 голови на 65 натпревари под водство на Мота во дресот на Болоња и сигурно веќе размислува за нов предизвик во кариерата, додека Зиркзе е во втор план во својот нов клуб Манчестер Јунајтед.

Холандскиот интернационалец веќе размислува за друг клуб и постои опција да дојде во Торино на заем, но за такво нешто согласност ќе се чека и од Рубен Аморим и раководството на Јунајтед.