Мота: Ќе ја гледаме табелата на крајот на сезоната

Јувентус дојде до седмата сезонска победа во италијанскиот шампионат и тоа на „Бриантео“ каде ја совлада Монца со 2-0.

МекКени и Гонзалес стрелаа за прво славје на „старата дама“ во Серија А по месец ноември, поточно за прекин на серијата на нерешени натпревари.

-Отсекогаш сме се мачеле против екипи кои се бранат и одат на контра. Требаше да го „убиеме“ натпреварот, ова е дел од процесот на напредок, преземајќи дополнителен ризик против овие тимови и потенцијално дозволувајќи контра-напади. Бевме во позиција квалитетно да ги направиме транзициите во вториот дел кога поведовме, но не го направивме тоа доволно добро, -истакна тренерот Тијаго Мота кој е задоволен како Вестон и Николас се најдоа во новите улоги, позиции.

-Нико Гонзалес и Мекени се отворени за преземање улоги кои не секогаш ги имаат, но тоа го прават многу добро затоа што имаат високо ниво и задоволство е тренерот да работи со момци кои имаат ваков став, -рече Мота кој порача дека табелата ќе ја гледаат на крајот на сезоната.

-Ќе ја гледаме табелата само на крајот од сезоната. Пред тоа одиме натпревар по натпревар и се обидуваме да целиме кон максимален резултат против секој противник, -заклучи стратегот.

„Старата дама“ има девет бода помалку од лидерот Аталанта.